Агенцијата за млади и спорт организираше прием за нашите најдобри ракометни судии, кои беа дел од финалето на машкиот ракометен турнир на Олимписките игри во Токио, Ѓорѓи Начевски и Славе Николов.

– Голема чест и задоволство ми претставуваа што наши гости се луѓето кои претставуваат величини во македонскиот и светски ракомет. Одлуката да ја делите правдата во финалниот натпревар на најголемиот спортски настан е доволен показател за квалитетот и реномето кое го имате стекнато во светската ракометна судиска фела.

Наша заложба е што поскора измена на Законот за спорт, во кој освен спортистите кои со врвни меѓународни одличја остваруваат право на таканаречената спортска пензија, оваа придобивка да ја имаат и спортските работници, како неоспорен дел од спортот воопшто – рече директорот на Агенцијата за млади и спорт Наумче Мојсовски.

– Ова е наша трета олимпијада и некако беше очекувано после толку натпревари на светското во Египет, како и седум натпревари на ОИ во Токио, речиси секоја од нив дерби натпревар, да ја добиеме можноста да ја делиме правдата во едно финале – истакна Начевски.

Начевски и Николов го судеа финалниот натпревар на 7 август помеѓу Франција и Данска, во кој Французите беа подобри со 25:23.

Тој додаде дека ништо не е случајно и дека за да се изборите во еден таков ракометен врв, а доаѓате од една мала земја како нашата, мора да се три пати подобри и по квалитетни од другите.

Искажа голема благодарност за иницијативата на Мојсовски за вреднување на остварувањата на спортските работници. Своите импресии од ОИ ги искажа и Николов потенцирајќи дека за прв пат се дава важност и на спортските работници како важен фактор во спортот. Мојсовски во знак на благодарност за сите досегашни остварувања во областа на ракометот им додели плакети.