За поздравување е заложбата за имплементирање на стратегијата за дигитализација на судството и судски услуги, бидејќи во некоја мера би подразбирало олеснување на пристапот на граѓаните до определени услуги кои произлегуваат од овие институции, вели во изјава за “Слободен печат”, Натали Петровска, адвокат и прв човек на Коалиција “Сите за правично судење”.

– Со ваквото осовременување би се поедноставил начинот на кој, на пример, граѓаните би се здобиле со документи и уверенија кои ги издава судот, а при тоа, од финансиски аспект ова би претпоставило и значително олеснување во остварување на нивните права и пристап до услуги.  Меѓутоа, кога станува збор за онлајн судења, потребен е исклучително внимателен и темелен пристап и претходно спроведени суштински анализи на кои би се темелеле овие промени кои се иницираат. Имено, неколку принципи, како на пример адверсаријалноста односно ефективното учество на странките во постапките, како и јавноста и усноста на судските расправи мораат да бидат целосно испочитувани, поради што мора да се пристапи со особено внимание кон употребата на интернетот и компјутерската технологија со цел истите да не придонесат кон нарушување на некој од овие принципи – вели Петровска.

Таа истакна дека за успешна дигитализација е потребно да постојат соодветни материјално технички услови, како и доволен број на човечки ресурси кои ќе бидат соодветно обучени за користење на оваа технологија.

-Потребно е да се предвидат и соодветни гаранции кои ќе го земат предвид ефективното и ефикасно учество на странките во постапките, вклучувајќи ги тука и сведоците, а имајќи ја предвид комплексноста на една постапка. Покрај ова, ќе бидат неопходни и интервенции во самите процесни закони кои соодветно ќе го предвидат начинот и степенот на ваквото функционирање на судовите, како и кои ќе предвидат соодветни процесни гаранции за заштита пред сé на начелото на еднаквост на оружјата, ефикасното учество во постапката, како и јавноста на постапките кои евентуално би се спроведувале онлајн – потенцира таа.