Румен Радев е претседателот со кој ќе продолжи промената. Ова го изјави Кирил Петков – лидер на истоимената партија која победи на парламентарните избори минатата недела. Тој рече и дека процесот на формирање влада е транспарентен и дијалошки.

-Претседателот Румен Радев е вистинскиот избор за Бугарија, изјави Кирил Петков, цитиран од БНР.

Претходно денеска кога го оствари своето право на глас на претседателските избори ги коментираше и преговорите за формирање на кабинет. Веќе се формирани 18 преговарачки тимови за клучните приоритети за кои ќе се бара договор.

-Се надевам дека ќе имаме дијалошки разговори за да видиме кои се нашите заеднички идеи во стратегиите. Ќе разговараме и за разликите. Целата бугарска јавност ќе може да има целосен пристап до информациите за тоа како се водат преговорите. Се ќе се емитува онлајн и се надевам дека оваа транспарентност ќе даде дополнителен дијалог меѓу партиите”.

Според него, при формирање влада нема да се следат рокови по секоја цена.

-Целта ќе бидат конструктивни, детални преговори, кои подоцна ќе ги исклучат конфликтите меѓу партнерите, изјави Кирил Петков.