„Петарда“ во мрежата на Галата, Легија поблиску до дуел со Адеми и Ристовски
Денеска се одиграа нови натпревари од второто квалификациско коло во Лигата на шампионите, најлошо помина составот на Галатасарај кој на „Филипс“ стадионот во Ајндховен загуби со убедливи 5:1 од ПСВ.
Турскиот гигант ќе има тешка задача на реваншот да ја анулира негативата, Холанѓаните водеа со 2:1 по првото полувреме, а најзаслужен за нивниот висок триумф беше Захави кој запиша хет-трик, воедно забележа и една асистенција.
Значајна партија имаше и Геце кој двапати се запиша во листата на стрелците, а единствениот погодок на спротивната страна беше дело на Килинц.
Легија триумфираше со 2:1 на домашен терен против Флора, Полјаците водеа со голот на Капуцка уште од третата минута.
На стартот од вториот дел естонскиот тим израмни преку Сапинен, а конечниот епилог го постави Лопес во самиот финиш од средбата (90+1`).
Потсетување дека победникот од овој дуел ќе игра со подобриот од пресметката Динамо Загреб – Омонија, а таму по првите 90 минути хрватската екипа во чии редови настапуваат македонските репрезентативец Аријан Адеми и Стефан Ристовски имаат предност од 2:0.
Во другите средби: Алмати – Црвена звезда 2:1, Малме – ХЈК 2:1, Мура – Лудогорец 0:0, Слован Братислава – Јанг Бојс 0:0, Олимпијакос – Нефчи Баку 1:0.