Православните верници на 27 февруари го започнаа големиот и најстрог пост кој ќе трае до Велигден – 15 април.

Велигден полека се ближи, а доколку сте почнале да размислувате кои колачи би можеле да ги направите, во продолжение ви пренесуваме 5 рецепти за највкусните посни колачи.

1. Обланди Фигаро

Состојки:

– 100 грама суви сливи

– 100 грама смокви

– 100 грама урми

– 100 грама суво грозје

– 100 грама ореви

– 100 грама печени лешници

– 1 лажица шеќер во прав

– 2 лажици мед

– сок од 1 лимон

– 2 мали обланди

– 100 грама чоколадо

– 30 грама мелени печени лешници за посипување

Подготовка:

Урмите, смоквите и сливите исечкајте ги на тенки резанки, измешајте ги со крупно сечканите ореви и истолчени печени лешници, сувото грозје и сокот од лимон. Додајте шеќер во прав и мед и добро измешајте. Ставете ја смесата помеѓу обландите и притиснете со потежок предмет. Следниот ден прелијте со чоколадо и посипете со мелени печени лешници, па кога ќе се стврдне, исечете на штангли.

2. Бајадера

Состојки:

– 300 грама мелени посни бисквити

– 200 грама мелени ореви

– 250 грама шеќер

– 1 ванилин шеќер

– 10 лажици вода

– 200 грама посен маргарин

– 150 грама посно чоколадо за готвење

За глазура:

– 3 лажици шеќер

– 3 лажици вода

– 3 лажици масло

– 100 грама посно чоколадо за готвење

Подготовка:

Во тенџере сипете шеќер, вода и ванилин шеќер, па варете додека не зоврие. Тргнете ја смесата од оган,  додајте го маргаринот и мешајте додека маргаринот не се растопи. Потоа додајте ги мелените бисквити и мелените ореви, па сè убаво измешајте. Добиената смеса поделете ја на два дела. Едниот дел оставете го жолт, а во другиот додајте го растопеното чоколадо.

Во правоаголен плех прво сипете го делот со чоколадото, а потоа и вториот дел од смесата. Оставете во фрижидер. Глазурата направете ја дури кога колачот целосно ќе се стегне. Во тенџере сипете масло, вода, шеќер, маргарин и чоколадо за готвење, па мешајте на ринглата додека не се соединат сите состојки. Додека е топла глазурата прелијте ја врз колачот и оставете да се излади. Потоа бајадерата исечкајте ја на коцки или штангли и послужете.

3. Топчиња од сусам

Состојки:

– 125 грама маргарин

– 4 лажици мед

– 4 лажици шеќер

– 100 грама чоколадо

– 100 грама мелени бисквити

– 100 грама мелени ореви

– 200 грама сусам

Подготовка:

На сува тава кратко пропржете го сусамот. Посебно, во друго тенџере соединете ги медот, маргаринот, исскршената чоколада и шеќерот, па загрејте на умерена температура додека не се добие еднолична смеса. Потоа, тргнете од ринглата, додајте ги пржениот сусам, мелените бисквити и оревите и убаво измешајте. Од подготвената смеса направете топчиња (или формирајте салама и оставете ја во фрижидер да се стегне, па исечете ја на парчиња).

4. Чоко розен триаголници

Состојки:

– половина пакување кора од розен колач

– 200 грама шеќер

– 125 грама маргарин

– 2 лажици какао

– 100 грама мелени бисквити + 30 грама за посипување

– 100 грама чоколадо

Подготовка:

Шеќерот измешајте со 1 децилитар вода, па тргнете го од шпорет и додајте го на парчиња исечениот маргарин, со постојано мешање да се растопи маргаринот. Потоа, додајте какаото, 50 грама чоколадо и мелените бисквити, па добро измешајте. Кората од роза пресечете ја на половина по ширина (другата половина оставете ја за уште еден вид колачи), а потоа филувајте ги корите со топол фил. Намачкајте ја со фил и горната кора, па прелијте ја со 50 грама растопено чоколадо и посипете со мелени бисквити. Оставете да се стегне и излади, па исечете ги на триаголници.

5. Карамел коцки

Состојки:

– половина кора за розен торта

– 125 грама маргарин

– 200 грама шеќер

– 1 пудинг од карамела

– 400 милилитри млеко од соја

– 150 грама мелени печени лешници + 50 грама за посипување

Подготовка:

Шеќерот карамелизирајте го на тивок оган, па сипете 300 милилитри млеко од соја и мешајте додека не зоврие и додека карамелот не се растопи. Во преостанатото млеко измешајте го пудингот од карамела, па додајте го во зовриеното млеко и мешајте додека не се згусне. Потоа, додајте го маргаринот исечен на ленти и мелените печени лешници, мешајте додека не се изедначи масата, а потоа со топол филм филувајте ја кората. Исфилувајте ја и горната кора, па посипете ја со мелени печени лешници и оставете да се излади и да се стегне. Колачот сечете го на коцки.