Хрватскиот репрезентативец Иван Перишиќ и официјално е нов фудбалер на германскиот шампион, Баерн Минхен. Перишиќ во редовите на германскиот клуб доаѓа на едногодишна позајмица која го чинеше тимот пет милиони евра, а Баерн на крајот од сезоната ќе може да го откупи договорот за сума од 20 милиони евра.

#FCBayern have signed Croatia international Ivan Perišić. The World Cup runner up will join the club on loan from Inter Milan with immediate effect. #ServusIvan #MiaSanMia pic.twitter.com/gHJVZtxYOC

— FC Bayern English (@FCBayernEN) August 13, 2019

Перишиќ од 2015 година е член на Интер, но со доаѓањето на Антонио Конте на тренерската клупа, го загуби местото во првиот тим по што одлучи да се врати во Бундес лигата. Претходно Перишиќ од 2011 до 2013 година настапуваше за Борусија Дортмунд, а потоа две години мина и во редовите на Волфсбург.

– Среќен сум што се враќам во Германија, Баерн е еден од најголемите светски клубови и мило ми е што сум дел од него. Сакам со Баерн да триумфирам не само во Бундес лигата, туку и во Лигата на шампионите – изјави Перишиќ на официјалната промоција како најново засилување за германскиот тим.

Хрватот во Минхен дојде откако претходно на баварците им пропадна трансферот на Лерој Сане од Манчестер сити. Сане на последниот контролен натпревар за „граѓаните“ заработи повреда на вкрстените лигаменти на коленото по што пропадна трансферот во Баерн вреден 100 милиони евра.