Претседателот Стево Пендаровски во интервју за Телма изјави дека нема шанси за нов договор за соработка и добрососедство со Бугарија.

„Вон памет е некаков нов договор од веќе потпишаниот договор за соработка и добрососедство помеѓу двете држави или некој амандман на тој договор. Тоа што сме потпишале и ние и тие треба да го реализираме“, вели Пендаровски.

Тој рече дека со министерот за надворешни работи Бујар Османи се слушнал завчера кога тој се вратил од Софија и дека нема никаков сет на предлози, дека Софија предлага да потпишеме дека ќе го смениме Уставот и ќе ставиме дека како нација и јазик постоиме од 1945 па наваму.

„Нема такво нешто, мислам на некаков договор“ –рече Пендаровски и додаде дека заедничките комисии ќе се состанат следните два дена во Скопје за да се расчистат историските несогласувања.