Пендаровски не очекува промена на позициите на Бугарија по изборите во април

Претседателот Стево Пендаровски не очекува промена на позициите на Софија кон Скопје и по изборите во Бугарија на 4 април. Во синоќешното интервју за ТВ Клан, шефот на државата рече дека за жал вестите од Бугарија зборуваат за „тврд став и на опозицијата и на власта во однос на нашата земја, така што кој и да дојде по избори битна измена ќе нема”.

Сепак, се надева дека со помош на, како што наведе, „нашите европски пријатели во Брисел ќе се најде формулација со која нема да се негира нашето основно право како се чувствуваме и се декларираме и на таков начин ќе успееме да ги почнеме преговорите со ЕУ”.

Прашан за позициите на Софија за идентитетот, јазикот и за постоење македонско малцинство во Бугарија, Пендаровски вели дека не треба да се навлегува во барања поврзани со самоопределувањето.

-Нивната теза е дека ние од тука треба да се откажеме од обидите да инсталираме некекво македонско малцинство во Бугарија. Принципот број еден во меѓународните односи, особено по 1945 година е немешање во внатрешните работи на други држави. Според тоа, ние не смееме и не сакаме да се мешаме во внатрешниот поредок на Бугарија. Но, ако некој индивидуално се декларира како Македонец и бара право во Советот на Европа или други организации кои се занимаваат со човекови права, тоа не значи дека некој од Скопје го инструирал и платил. Имаме луѓе кои се декларираат како Македонци и во Грција. Во Преспанскиот договор ние не се откажуваме од нив, изјави Пендаровски.

Тој очекува засилен ангажман и на САД на Западен Балкан по победата на Џо Бајден, бидејќи во неговата администрација има луѓе кои имаат директни искуства во регионот.

– Меѓу нив е Викторија Нуланд, која има лична релација и со нас, со Северна Македонија, но и со регионот, посочи претседателот Стево Пендаровски.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот