Педесет амбасадори на должност во Полска и претставници на меѓународни организации доцна синоќа објавија отворено писмо за поддршка на правата на ЛГБТ заедницата во таа земја.

„Ние го потврдуваме основното право на секој поединец како што е изразено во Универзалната декларација за човекови права”, се наведува во писмото.

Правата на ЛГБТ заедницата се чувствително прашање во Полска. За време на претседателската кампања годинава, Анджеј Дуда на митинг рече дека „се обидува да се убеди дека ЛГБТ се луѓе, но тоа е едноставно идеологија”.

Дел од полската и меѓународната јавност исто така беше револтиран од необврзувачките резолуции „против ЛГБТ идеологијата”, прифатени од десетици локални власти во Полска.

„Човековите права не се идеологија – тие се универзални”, напиша на Твитер американската амбасадорка во Полска Џорџет Мосбахер, една од потписничките на писмото.

За конзервативните гласачи и пратеници во Полска, застапувањето за правата на ЛГБТ заедницата е еднакво на напад врз семејните вредности.

Полска не дозволува бракови ниту регистрација на истополови заедници, иако некои истражувања покажуваат дека би биле поддржани од мнозинството граѓани.