На крајот од 2020 година, изменет е Законот за заштита на населението од заразни болести и додаденa е нова законска одредба според која секое лице што се тестира за ковид-19, задолжително мора да оди во самоизолација од закажувањето на тестот до добивањето на резултатот. Самоизолацијата, според законските измени, продолжува доколку резултатот е позитивен.

Ова е одговорот на доктор Ирина Сотирова Бухова, директорка на Државниот здравствен и санитарен инспекторат на заканата со тужба на градоначалникот на Охрид Кирил Пецаков. Според доктор Бухова, законот е јасен и се однесува на сите лица.

Пецаков претходно кажа дека на Водици се тестирал за ковид-19 заради патување во странство, а додека го чекал резултатот продолжил да ги извршува обврските, иако го немал добиено резултатот од тестирањето.

На 19 јануари, ден Водици, се тестирав во Центарот за јавно здравје Охрид, не поради чувствување на симптоми поради ковид, туку поради патување (уплатено од 20-23 јануари) и потребата за поседување на негативен ПЦР-тест. Нормално, не бев во изолација. Што би се случило доколу илјадници луѓе кои поради потребата за патување во странство би се изолирале чекајќи резултати и секако не постои ниту еден пример кој се изолирал додека чекал резултати за ПЦР тест за странство, така што јас во текот на тој ден бев со охриѓани кои го славеа големиот христијански празник, рече градоначалникот на Охрид.

Меѓутоа, законот е јасен и предвидува дека сите тестирани треба да чекаат во изолација дали ќе бидат позитивни или негативни на ковид-19, независно од тоа дали се тестираат заради патување или поради друга причина.