Отворањето на дискусиите меѓу Берлин и Москва за набавка на вакцини „Спутник В“ се објаснува со изборниот контекст преку Рајна, смета францускиот државен секретар за европски прашања Клемен Бон, кој притоа изрази жалење за  овој „комуникациски потег”, јави дописникот на МИА.

-Во Германија започнува изборна кампања (со оглед на законодавните избори во септември). Ова исто така објаснува зошто има многу метеж. Мислам дека тоа беше комуникациски потег, за што жалам, изјави тој на програмата на Гранд жири РТЛ / Ле Фигаро / ЛЦИ.

-Испраќање сигнали (..) кои даваат впечаток дека има дози во фрижидер што спијат и кои не ги користиме, сето ова не е одговорно и не е многу сериозно, додаде тој.

Германскиот министер за здравство Јенс Шпан во четвртокот објави дека неговата земја ќе иницира дискусии со Русија со цел можна набавка на „Спутник В“, доколку вакцината против ковид е одобрена од европските власти.

-Канцеларката Ангела Меркел… рече дека сака тоа да биде во европските рамки, рече Клемен Бон.

-Самиот министер за здравство рече дека руската вакцина не може да се произведува два до пет месеци, поради доцнењето во добивањето на нејзино одобрување во ЕУ и создавањето на доволни производствени капацитети, продолжи тој.

Прашањето за употребата на Спутник е контроверзно во Европа. Францускиот министер за надворешни работи Жан-Ив Ле Дријан неодамна ја критикуваше Русија дека ја користи како алатка за „пропаганда” ширум светот.