Париски „Фигаро“: Зошто Бугарија не сака Северна Македонија да се приклучи кон ЕУ?

Румен Радев и Стево Пендаровски / Фото: EPA-EFE/GEORGI LICOVSKI

Веќе 16 години Северна Македонија трпеливо чека пред портите на ЕУ, иако нејзините лидери веруваа дека ја отстраниле најголемата пречка во 2018 година со потпишување на Договорот од Преспа за решавање на 30-годишниот спор околу името со Грција, наведува парискиот весник „Фигаро“, додавајќи дека сега Софија се повикува на историјата за да го оправда ветото на евроинтеграцискиот процес на земјава од страна.

Како што јави дописникот на МИА, весникот потсетува дека Преспанскиот договор предвидуваше земјава да се преименува во Северна Македонија, како „цена што ја плати малата земја со 2 милиони жители за влез во НАТО во март 2020 година и за конечно да го започне долгиот процес за влез во ЕУ”.

– Но, не се сметаше на Бугарија, која стави вето минатата година и во исто време го блокираше и процесот на пристапување на Албанија, наведува „Фигаро“, додавајќи дека Парламентот во Софија дури усвои и Резолуција за условување на евроинтеграцијата на земјава, поднесена од бугарската националистичка партија ВМРО, тогашна членка на владејачката коалиција.

Според оваа резолуција, додава парискиот весник, „македонскиот јазик, кодифициран во 1945 година, не може да се смета за посебен јазик, туку за бугарски дијалект”.

– Никој не го оспорува правото секој да ја дефинира својата нација и да го нарекува својот јазик како што сака. Но, не можеме да прифатиме дека ова право се заснова на омраза, кражба на историја и негирање на Бугарија, рече тогашната бугарска министерка за надворешни работи Екатерина Захариева.

„Фигаро“ наведува дека до 40-тите година на минатиот век, Северна Македонија во повеќе наврати беше управувана од Бугарија.

– Договорот за добрососедство беше потпишан во 2017 година и беше формирана заедничка комисија за да ја разгледа нивната „заедничка историја”. Но, тоа не помага. Двете земји продолжуваат да се борат за своите херои, редовно се грижат за третманот на нивните малцинства во другата земја и ја критикуваат содржината на историските книги, наведува весникот.

Анонимен европски дипломат за „Фигаро” вели дека во овој случај „никој не целосно бел, ниту целосно црн“. Весникот додава дека поранешниот специјален претставник на ЕУ во Северна Македонија, Ерван Фуере смета оти случајот е „многу сериозен” и „исклучително штетен за Балканот, како и за цела Европа”.

– Ако прифатиме дека проширувањето ги зема предвид прашањата поврзани со толкувањето на историјата и идентитетот, тогаш да не зборуваме повеќе за проширување, вели Фуере за „Фигаро”.

– Сега кога политичката ситуација во Бугарија е многу нејасна, некои сакаат да веруваат дека претседателските избори закажани за средината на ноември ќе помогнат да се деблокира процесот. Оваа среда (во Брдо кај Крањ), Европејците ќе се потсетат на потребата да се најдат и спроведат конечни решенија за билатералните проблеми на партнерите вкоренети во наследството од минатото, заклучува париски „Фигаро“.

Извор: МИА

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот