Папата Франциск даде милион евра за нова фондација која ќе им помага на Римјаните погодени од економската криза предизвикана од коронавирусот.

Со фондацијата наречена „Исус, божествен работник“ ќе управува римската филијала на Каритас, христијанската фондација, соопшти денеска Римската бискупија.

Освен што е поглавар на 1,3 милијарди католици, Папата е и римски бискуп и својата донација ја даде во тоа својство.

Во писмо до кардиналот Ангело Де Донатис, кој со Римската бискупија управува во негово име, Франциск рече дека тие средства би требало да им помогнат на луѓето со финансиски проблеми.

Спомена и луѓе со повремена работа и привремени договори кои не им се продолжени, стажанти, мали претприемачи, работници во домаќинства и самовработени.

Истакна дека многу од нив се „мајки и татковци кои мака мачат да обезбедат храна за своите деца“.

Ги повика јавните институции, свештениците и жителите да се приклучат кон оваа хуманитарна иницијатива.

„Им се обраќам на сите Римјани со добро срце“, порача тој.

Де Донатис, кој и самиот го победи коронавирус, со кој се зарази кон крајот на март по што помина 10 дена во болница, рече дека многу му е благодарен на папата Франциск.