Синоќа Парма на натпреварот од деветтото коло во Серија А ја совлада Џенова на гостински терен со головите на Жервињо, а единствениот погодок кај поразените беше дело на Шомуродов.

При резултат 1:2 во 69 минута во игра влезе македонскиот репрезентативец Горан Пандев, нашиот 37-годишен играч се бореше на теренот во обид да го спаси клубот од нов пораз. Џенова е во резултатска криза со само пет бодови и дури четири порази во низа, претпоследна во опасната зона за испаѓање.

А уште поболно за навивачите на оваа екипа е однесувањето на тројца играчи на Џенова кои не беа во составот, но седеа на ложата од стадионот, информира „Кориере дело Спорт“.

Il Genoa perde, i giocatori guardano i cellulari: bufera sui social per una foto https://t.co/My3T5Cj8da

— Corriere dello Sport (@CorSport) December 1, 2020

Беше во тек 85 минута, Џенова и Пандев се трудеа со сите сили да дојдат барем до израмнување, а младите Клаудиу Миковши, Дариан Малес (19) и Џоел Асоро (21) наместо да даваат поддршка, си гледаа во своите мобилни телефони и се занимаваа со други работи. Нашиот Пандев во минатото со своите голови донесувал радости на клубот кога е најпотребно, а со ова тројцата млади фудбалери воедно не покажуваат никаква почит.

Таа фотографија на социјалните мрежи стана вирална, а навивачите на поранешниот италијански великан (деветпати шампиони на Италија) лути поради крајната незаинтересираност на ова трио за кое клубот исто така плаќа.