Не е мал бројот на луѓе што беа вработени во спа и во велнес центри, во теретани и во фитнес клубови. Нивниот број пред падемијата изнесувал околу 5.000 луѓе, но за жал, според сознанијата на Спа и велнес асоцијацијата на Македонија (СВАМ), сега нивниот број е преполовен.

Според претседателот на СВАМ, Александар Мендов, сега спа, велнес и фитнес индустријата се наоѓа во најлоша состојба во своето постоење.

– Спа, велнес и фитнес индустријата неможејки да ги следи светските, европските, па и балканските искуства, е на работ на банкрот. Оваа индустрија е оставена сама да се снаоѓа со мерки и протоколи кои се општи и кои не се однесуваат на нејзината специфична секојдневна работа, а кои се истовремено и контрадикторни и неразбирливи – вели Мендов.

Мендов вели дека во велнес и фитнес индустријата генерално нема отпуштања, но затоа многу е намален бројот на вработените во фитнес секторот.

– Целата спа, велнес и фитнес индустрија, во регистрираните субјекти имаше 5.000 вработени, но нивниот број се преполови за време на пандемијата. Генерално, отпуштања не се регистрирани во делот на спа и велнес, освен што вработените работат редуцирано, со пола работно време, а во хотелите е забележан и тренд на работа од 4 часа и тоа два до три работни дена во неделата. работејки без донесени протоколи за спа и велнес објектите. Спротивно на ова е фитнес индустријата, каде се вработени по еден, или максимум двајца во објект, и оваа индустрија бележи огромен пад и затворање на салите за вежбање и теретаните поради строгите протоколи за работа. Од друга страна, небезбедното справување со протоколите од страна на сопствениците, создава дополнителен страв кај посетителите. Според овие информации може да се заклучи и дека примањата на вработените во спа и велнес центите, како и на нивните сопственици, се сведени под минимум – вели Мендов.

Тој оценува дека државата има направено минимални мерки за спречување на ваквата состојба.

-Освен за време на последното затворање на хотелите и фитнес центрите кога беа исплатени минимални 14.000 денари за плати, други мерки не беа преземени. Користејки ги искуствата од нашето опкружување, европските и светски искуства, СВАМ како претставник на спа, велнес и фитнес фелата во Македонија има предложено низа мерки за кои надлежните институции треба да се произнесат – вели Мендов.

Некои од идеите за надминување на оваа тешка состојба се: ослободување од плаќање на придонеси за здравствено и пензионо осигурување во времетраење од 6 месеци; финансиска помош во висина од 30 отсто од приходот остварен во 2019 година да се даде во 2021 година; можност за кредит со 1 процент камата, и грејс период од една година; ваучери за користење на спа, велнес и фитнес центри и нивните услуги; инвестирање во професионалното образование и промовирање на Македонија како спа и велнес дестинација „фри ковид“; приоритет за вакцинирање на хотелските работници и фитнес работниците; донесување на протоколи за работа за спа центрите, салоните за масажа; субвенции за купување УВ апарати за спа, велнес и фитнес објектите за целосна заштита од бактерии и вируси на вработените и на посетителите; откажување на општините од наплата на фирмарина и истакнување на реклама.