Панчев: Пикси треба уште најмалку четири години да биде селектор на Србија
Легендата на Црвена звезда, поранешниот македонски репрезентативец Дарко Панчев вели дека Драган Стојковиќ – Пикси мора да остане селектор на Србија и дека не треба да се повторуваат грешките од минатото.
Српските фудбалери го завршија учеството на Мундијалот во Катар веќе во групната фаза, без ниту една победа и со само еден освоен бод. Со Бразил одиграа 0:2, со Камерун 3:3, додека беа поразени од Швајцарија со 2:3.
– Секоја втора година ли Србија ќе го менува селекторот? Пикси мора да остане на кормилото уште најмалку четири-пет години, да го задржи постоечкиот кадар. Континуитетот е услов за постигнување успех. Да се потсетиме на смената на Славољуб Муслин, човекот со Србија се квалификуваше на Мундијалот во Русија, и го сменија…Се смееше цела Европа. Ќе повторам: Пикси заслужува доверба за новите радости на фудбалската нација. А, што се однесува до грешките, сѐ што беше забележано во Катар ќе има можност да се поправи и да замине во историјата – изјави Дарко Панчев за „Спортклуб“.
Според Панчев српската фудбалска репрезентација не заслужува премногу критики.
– Неуспех на Србија? Да, неуспех. А сепак, не сум од оние кои гледаат на сѐ црно, овој српски тим не заслужува премногу критики. Велам, тимот, мислам и на стручниот тим и на играчите, да не заборавиме дека во последните две години беа постигнати забележителни резултати, играа добро, имаше натпревари кога играа фантастично, и како сега, одеднаш, се зборува и пишува дека овие играчи немаат поим?! – вели Панчев.