ПАНЧЕВ: Баерн вечерва има среќа – бев „будала“, го одбив Манчестер јунајтед!
Говореше во интервјуто за германскиот „Тагесшпигел“ во кое најпрвин се потсети на гостувањето на својата Црвена Звезда во Минхен во април 1991 година во полуфиналето од Купот на европските шампиони, кога имаше голем придонес во триумфот на српскиот гигант од 1:2.
– Подоцна дознав дека тоа беше првиот пораз на Баерн на свој терен во европските натпреварувања после 23 години – се зборовите на Панчев.
Ја пофали денешната Црвена Звезда и нејзиниот стручен штаб, а во врска со вечерашниот меч од новата сезона во Лигата на шампионите (21.00 часот) се пошегуваше дека на „црвено-белите“ им недостасуваат двајца фудбалери.
– Тренерот Владан Милојевиќ и челниците на клубот одлично се снајдоа со скромните средства. Баерн е сигурно голем фаворит, а освен тоа има и среќа, бидејќи Дејан Савичевиќ и јас повеќе не играме (смеа). Но, во фудбалот се е можно. Црвена Звезда е големо име во европскиот фудбал и тоа не треба да се заборави – вели Панчев.
"Das war ein großer Sieg" – Darko Pancev erinnert sich im Interview an ein legendäres Duell mit Roter Stern Belgrad gegen den @FCBayern und spricht über die heutige #ChampionsLeague #FCBFKCZ https://t.co/pFYxXSCSvr
— Tagesspiegel Sport (@TspSport) September 18, 2019
Воедно обрна внимание на својата фудбалска кариера после Бари, трансферот во Интер, нереализираната преселба во Манчестер јунајтед…
– Бев навистина популарен во 1992 година и имав многу понуди за трансфер, но за жал се одлучив за погрешен клуб. Интер имаше просечен тим во сенка на Милан. Покрај тоа, имав големи несогласувања со поранешниот трнер Освалдо Бањоли, што секако беше контрапродуктивно. Сепак, наредната зима добив понуда од Сер Алекс Фергусон, кој сакаше да ме води во Манчестер јунајтед. Меѓутоа, сакав да им докажам на Италијанците дека можам да играм во Серија А. Бев будала (смеа) – објаснува Панчев.
Според македонската фудбалска легенда Дарко Панчев денес постои поразлична хиерархија во светскиот фудбал. 10 клубови ги делат трофеите меѓу себе, додека 100 останати заостануваат и често се борат со финансиски проблеми.