Палмер: САД сака нормализирање на односите помеѓу Србија и Косово
Специјалниот претставник на САД за Западен Балкан, Метју Палмер, денеска изјавил дека САД, сака да види полна нормализација на односите помеѓу Србија и Косово.
Според него, оваа нормализација подразбира меѓусебно признавање меѓу двете земји. Палмер за босанскиот медиум N1, изјавил дека е потребно Белград и Приштина да седнат на преговарачка маса, да постигнат договор и да тргнат по патот кон Европската Унија.
-Треба да се постигне договор кој ќе биде прифатлив и поддржан од јавноста од двете страни, како најдобар начин да се оди напред. Потребно е договорот да биде применлив, праведен и да може да опстои- изјави Палмер.
Палмер истакнал дека со специјалниот преставник на претседателот Трамп, Ричард Гренел, има многу добри односи, и дека треба да се потенцира дека ова не е прв пат САД да испрати двајца претставници за некое прашање.