Американскиот заменик помошникот државен секретар Метју Палмер по „виртуелна посета” на Албанија упати порака со која побара изборите на 25 април да бидат според демократските стандарди и да се обезбеди граѓаните да им веруваат на изборните резултати.

Тој потврди дека разговарал со претседателот Илир Мета, премиерот Еди Рама и претседателот на опозициската Демократска партија, Љуљзим Баша, оценувајќи ги како добри разговори а ги пофали и напорите во правосудната реформа.

-Имав добри разговори со претседателот и премиерот. Ги ценам напорите направени во правосудната реформата. Изборите треба да бидат според демократски стандарди. Разговарав и со лидерот на Демократската партија, Љуљзим Баша. Да се обезбеди Албанците да имаат доверба во исходот. САД се обврзаа да бидат силен партнер за Албанија. Ние сме посветени на евроатлантската иднина на Албанија, рече Палмер.

Додаде дека целосно ги поддржува изјавите на амерканската амбасадорка во Тирана, Јури Ким, за кандидатите кои се во трка за пратенички мандат.

-Амбасадорката Ким беше многу јасна во своите изјави дека партиските кандидати мора да бидат од доверба. Најважно е да се одржат транспарентни, слободни и демократски избори и да се продолжи со реформите во правосудството, каде има напредок, но има уште многу да се стори, посочува тој.

На тркалезна маса со новинари кои учествувале во програми за размена и обука во САД, тој се задржа и на процесот на вакцинација во Албанија и одлуката на Владата да набави вакцини од руско и кинеско производство.

Палмер рече дека изборот и припаѓа на Албанија и дека САД не се мешаат во внатрешните работи. Тој нагласува дека Албанија се обидува за својот народ развивајќи процес на вакцинација, без оглед од каде потекнуваат вакцините.