Палестинските власти се заблагодарија на сите противници на израелската анексија на Западниот Брег
Планот наиде на осуда од меѓународната заедница.
Палестинските власти им се заблагодарија на државите, верските и граѓанските организации и на поединците кои се спротивставија на израелската анексија на Западниот Брег.
Палестинското Министерство за надворешни работи изразува „благодарност за солидарноста и поддршката во одбраната на правото на палестинскиот народ на слобода, самоопределување и правда”.
„Во име на палестинскиот народ, Палестина сака да изрази најдлабока благодарност до сите држави, парламентарци … граѓански организации, верски водачи и институции, правни експерти, пријатели … кои продолжуваат да бидат на вистинската страна на историјата”, се наведува во соопштението на Министерството.
Израелскиот премиер Бенјамин Нетанјаху имаше намера да го започне процесот на анексија на 1 јули, во согласност со блискоисточниот план на американскиот претседател Доналд Трамп.
Планот предвидува дека 30 проценти од окупираниот Западен Брег ќе остане под постојана контрола на Израел и дека на Палестинците ќе им се даде ограничена автономија на преостанатата територија.
Планот наиде на осуда од меѓународната заедница.