Во текот на изминатото деноноќие полицијата изврши претреси во одделни случаи по поднесени пријави за основање сомневање за сторено кривично дело „неовластено производство и пуштање во промет на наркотични дроги, психотропни супстанци и прекурзори“, а во одредени случаи поднеле и кривични пријави против осомничени за истото дело.

– Во Велес полициските службеници по наредба на Основниот суд извршиле претрес во домот на С.К. (39) и М.К. (41) од село Удово, при што била пронајдена одредена количина марихуана и семки од марихуана. М.К е уапсен и по целосно документирање на случајот ќе биде поднесена соодветна кривична пријава – велат од СВР Велес.

Од таму исто така инфомираат дека поднеле и кривична пријава против лицето К.Ќ.(31) од Неготино поради основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурзори“ откако на 2 април извршиле претрес во неговиот дом, како и во викендица која ја користел. На двете места полицијата пронашла и одзела марихуана, односно мешавина од марихуана и тутун.

Полицајците од Гостивар пак, поднеле кривична пријава против Х.М.(44) од село Чегране, Гостиварско, бидејќи при претрес направен на 11 април годинава во домот на Х.М. биле пронајдени и одземени 2.820 грама марихуана.

И од СВР Гевгелија поднеле кривична пријава против А.Ш. (28) од Гевгелија поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурзори“. Имено, полицијата на 29 ноември минатата година при претрес во домот на пријавената, пронашла и одзела хероин и предмети со остатоци од хероин.