Падна првиот снег во делови од Бутел и Гази Баба, општинските служби ги расчистуваат критичните точки
Во текот на изминатата ноќ на повисоките делови од општините Гази Баба и Бутел падна првиот снег, па општинските служби ги расчистуваа сите критични точки и обезбедуваа проодност на патиштата.
Кризниот штаб имаше целовечено дежурство, но никаде снегот не се задржуваше на коловозите. Рано утрово екипи од ЈКП „Гази Баба“ фрлија сол и ризла на дел од патот помеѓу населените места Булачани и Раштак со цел да се спречи замрзување и да се овозможи нормално одвивање на сообраќајот. Ги следиме најавите за намалување на температурите и евентуални нови врнежи – информира градоначалникот Бобан Стефковски.
Тој порача дека граѓаните можат да бидат спокојни, затоа што службите од општината се подготвени за успешно справување со сите предизвици во зимски услови.
И од Општина Бутел тврдат дека со навремена брза реакција го дочекале првиот снег.
Службите се на терен и расчистени се првите наноси на снег. Исчистени се сите повисоки места и критичните точки во Општина Бутел, село Љубанци и село Љуботен. Апелираме до возачите да внимаваат и да ја прилагодат брзината согласно условите на патот – соопшти градоначалникот на Бутел, Дарко Костовски, кои тврди дека сите улици се проодни и во возна состојба и дека кризниот штаб постојано ја следи ситуацијата.