Неосновано е барањето за изземање на СЈО и неговите обвинители во случајот “Траекторија”. Без разлика што обвинителката Катица Јанева е во притвор, тоа нема да влијае на постапката. Ова после 3 часовна пауза го соопшти судијата Горан Бошевски од скопска единица, по однос на барањето на одбраната на обвинетите СЈО да се изземе од овој случај.

Судењето продолжува на 16-ти овој месец со изнесување на остатокот од материјалните докази. Во „Траекторија“ обвинети се поранешниот премиер Никола Груевски на кого му се суди во отсуство, екс министерот за транспорт и врски Миле Јанакиески, поранешниот вицепремиер Владимир Пешевски и екс директорот на ЈП Државни патишта Љупчо Георгиевски.

Според обвинението на СЈО, обвинетите во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатиштата Миладиновци-Штип и Кичево-Охрид ги искористиле и пречекориле своите овластувања. Со тоа му нанеле штета на Буџетот од најмалку 155 милиони евра.