Индустриското производство во август годинава бележи намалување во споредба со јули за 1,6 отсто, објави Државниот завод за статистика.

Најголемо е намалувањето во рударскиот сектор – 18,4 отсто. Минимални позитивни резултати има во секторите снабдување со електрична енергија, преработувачка индустрија, производство на тутун, текстил машини и уреди.

Во најновиот извештај на ДЗС се наведува дека според главните индустриски групи, производството во август 2024 година, во однос на август 2023 година, бележи пораст кај Капитални производи за 28.7 % и Трајни производи за широка потрошувачка за 34.0 %, додека опаѓање бележи кај Енергија за 8.7 %, Интермедијарни производи, освен енергија за 14.6 % и Нетрајни производи за широка потрошувачка за 5.0 %. Индексот на индустриското производство во периодот јануари – август 2024 година, во однос на периодот јануари – август 2023 година, изнесува 96.

„Секторот Преработувачка индустрија бележи пораст од 1.3 %, а во секторот Снабдување со електрична енергија, гас, пареа и климатизација опаѓање од 4.6 %. Зголемувањето во секторот Преработувачка индустрија е резултат, пред сѐ, на зголеменото производство во следните оддели: Производство на тутунски производи, Производство на текстил, Печатење и продукција на снимени медиуми (записи), Производство на хемикалии и хемиски производи, Производство на електрична опрема, Производство на машини и уреди, неспоменати на друго место, Производство на моторни возила, приколки и полуприколки, Производство на мебел и Поправка и инсталирање на машини и опрема.“ се наведува во извештајот на ДЗС.