Овчите сипаници најчесто акутно заболување во декември, пријавени се и три случаи на ХИВ
Во текот на месец декември, Институтот за јавно здравје регистрираше вкупно 1 610 пријави на овчи сипаници, како најчесто акутно заразно заболување. Пријавени се три случаи на ХИВ и 20 сексуално и крвно преносливи инфекции (БЕЗ ХИВ/СИДА).
Од вкупниот број пријави за сексуално и крвно преносливи инфекции (БЕЗ ХИВ/СИДА) седум случаи се вирусен хепатитис Б, шест се случаи на хламидија пет се случаи на сифилис и два на вирусен хепатитис Ц, соопшти ИЈЗ.
Трите пријавени лица на ХИВ се од машки пол. Според местото на живеење едно лице е од Скопје, и по едно лице од Струга и Свети Николе.
Лицата се на возраст од 30-44 години. Едно лице е хетеросексуалец, ЕДНО лице припаѓа на групата МСМ, а за едно лице начинот на трансмисија е непознат, се вели во соопштението
Во текот на месец декември нема регистрирани смртни случаи од ХИВ/СИДА.
Согласно постоечката евиденција на пријавени случаи, кумулативниот број на лица регистрирани со ХИВ/СИДА во земјава, во периодот од 1987 до 2022, изнесува 586, и тоа 123 лица починале, а 463 лица живее со ХИВ/СИДА, покажуваат податоците на Институтот.
Во однос на вакцино-превентабилните болести, во декември минатата година, регистрирани се девет случаи, од кои седум на вирусен хепатитис Б и два случаи на заразни заушки.
Регистрираните случаи на вирусен хепатитис Б според возраста на заболените, не подлежат на имунизација согласно календарот за задолжителна имунизација во РСМ. Дијагнозата е потврдена лабораториски и клинички. Случаите на заразни заушки подлежат на имунизација според возраста, едното лице е имунизирано, другото не е имунизирано. Случаите се дијагностицирани клинички, додаваат од ИЈЗ.