Властите во источен Сиднеј соопштиле дека повторно ќе ги отворат плажите за луѓето кои ги користат за вежбање, иако министерството за здравство на Нов Јужен Велс го означи тој регион како можно жариште на коронавирусот.

Поединечни плажи, кои беа затворени пред еден месец за да се спречи ширењето на вирусот, од понеделник ќе бидат достапни за одредени активности, како што се трчање, шетање, пливање и сурфање.

Луѓето кои ги користат плажите за вежбање мораат да задржат растојание од 1,5 метри од други луѓе, додека во група може да се најдат најмногу две лица.

Одлуката за повторно отворање на плажите наиде на негодувања, а критичарите оценуваат дека таа одлука е донесена прерано и стравуваат дека ќе го угрози досегашниот напредок кој е остварен за справување со ширењето на коронавирусот.