Ова е најлошата Барселона во последните 30 години, голем дел од вината е кај Меси
Барселона едвај го преживеа бурниот летен период кога најголемата ѕвезда Лионел Меси побара да си замине и влезе во војна со управата на клубот. На крајот Меси излезе како победник, Хосеп Марија Бартомеу си поднесе оставка од претседателската функција, но проблемите останаа и тие веќе се отсликуваат на теренот.
Барселона вчера загуби со 1:0 во дербито со Атлетико Мадрид и го претрпе третиот пораз во осмиот натпревар во Ла Лига. Каталонците се наоѓаат дури на 10. место на табелата со само 11. бода и тоа е најлошиот старт на Барселона во последните 20 години.
Последен пат Барселона во првите осум кола во Ла Лига, 12 бода имаше во 2002 и 2003 година, а 11 бодови последен пат имаа во сезоната 1991/92.
Интересно е што медиумите во Шпанија, и тоа мадридските „Марка“ и „АС“ сметаат дека главен проблем на Барселона е Лионел Меси. Аргентинецот на вчерашниот натпревар загуби дури 23 топки и за време на целиот натпревар изгледаше немоќно и тоа се одрази на играта на целата екипа.
Меси во цела 2020 година не постигнал ниту еден одлучувачки гол, а со заминувањето на претседателот Бартомеу, директорот Абидал и тренерот Кике Сетиен, ги снема причините да биде несреќен.
„АС“ смета дека Меси е вон форма, дека годинава не е лидер, а според анализата на говорот на телото изгледа како едвај чека да си замине од „Камп Ноу“. Весникот оди дотаму што смета дека е подобро во зимскиот преоден рок да биде продаден и да им се даде шанса на младите, потсетувајќи дека Барселона се откажа од Роналдињо токму за Меси да добие шанса да игра.
– Загрижен сум како и секој тренер во ваква ситуација. Имаме многу повредени поради напорниот распоред на натпревари. Знаеме дека мораме да ги подобриме резултатите и мора да им веруваме на играчите. Мора да се поодобриме и во одбраната и во нападот – вели Куман.