Хрватскиот министер за здравство Вили Берош потврди дека е покрената истрага врзана за смртта на новинарот на Индекс Владимир Матијаниќ.

Претходно, новинарката на Индекс Андреа Топиќ и животна сопатничка на 50-годишниот Матијаниќ објави хронологија од настаните во која откри дека итната помош не сакала да го хоспитализира новинарот.

Имено, два часа пред смртта, екипа на итната помош и објаснувала дека станува збор за нормални симптоми на ковид и не сакале да го хоспитализираат. Не реагирала ниту итната инфектолошка амбуланта ниту дежурниот лекар.

Исто така, два дена претходно, на Матијаниќ во болница му рекле дека во Хрватска има недостиг на лекови за спречување на тешки последици од ковид кои им се даваат на пациенти како него.

Сето тоа упатува на несоверно лекување заради што официјално е покрената истрага, пишува Индекс.