Отворен стечај за штипски „Бетон“, најголемиот корисник на тендерите за проектот „Скопје 2014“ - Слободен печат
ВестиЕкономија

Отворен стечај за штипски „Бетон“, најголемиот корисник на тендерите за проектот „Скопје 2014“

Според извештајот на привремениот стечаен управник, трите фирми од „Бетон“  побаруваат над 76 милиони 760 илјади денари  или над 1.233.000 евра.

Судијата од Основниот суд во Штип, Маја Џорлева на денешното рочиште донесе одлука да се отвори стечајна постапка за компанијата „Бетон“ АД Штип. Оваа одлука доаѓа по барањето на тројца доверители, односно фирми.

Според извештајот на привремениот стечаен управник, трите фирми од „Бетон“  побаруваат над 76 милиони 760 илјади денари  или над 1.233.000 евра.

Судијата и портпаролот на Основниот суд во Штип, Јулијана Неткова изјави дека на денешното рочиште присуствувале доверителите кои го доставиле барањето и привремениот стечаен управник.

-На денешното рочиште отворена е стечајна постапка врз имотот на должникот – градежната компанија „Бетон“ АД Штип. Оваа одлука за отворање на стечајна  постапка ќе биде објавена во Службен весник. Одлуката ќе биде објавена и на огласна табла во Основниот суд во Штип, а стечајниот управник ќе ја објави одлуката и во два весници, истакна Неткова.

Откако судијата од Основниот суд во Штип ќе ја објави одлуката во Службен весник во рок од 15 дена, побарувања ќе може да достават и други фирми, банки, институции и вработени.

Стечајниот управник во наредниот период ќе има задача да направи и попис на команијата „Бетон“ со цел да ја утврди неговата вредност со која ќе се подмируваат побарувањата кон доверителите.

„Бетон“ од Штип во изминатите десет години беше еден од најголемите корисници на тендерите за проектот „Скопје 2014“. Градеше вкупно седум објекти, а заработи 55 милиони евра. Оваа фирма беше споменувана и во „бомбите“. Проблемите во градежната компанија почнаа од лани при изградбата на новата Клиничка болница во Штип, кога вработените ја прекинуваа работата заради неисплатени плати по што кон крајот на 2018 година, грчката фирма „Интеркат“ го раскина договорот со „Бетон“ кој во овој случај беше подизведувач во изградбата на болницата. 

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Слични артикли

Напишете коментар

Вашата адреса за е-пошта нема да биде објавена. Задолжителните полиња се означени со *

Close