Откриена причината за смртта на актерот Мајкл К. Вилијамс
Американскиот актер и продуцент Мајкл Кенет Вилијамс беше еден од најценетите и најпознатите таленти на неговата генерација. Актерот беше пронајден мртов во својот стан во Њујорк на 6 септември, а сега е објавена причината за неговата смрт, пренесува „Би-Би-Си“.
Имено, актерот (54) починал од предозирање со комбинација на хероин, кокаин, фентанил и п-флорофентанил, потврди главниот патолог на Њујорк. Канцеларијата на главниот патолог во Њујорк истакна дека е утврдено дека актерот за жал починал од случајно предозирање. Вилијамс бил во бесознание кога неговиот внук го пронашол во станот на 6 септември.
Актерот во минатото отворено зборуваше за неговите проблеми со дрогата. Во една прилика, тој откри дека, додека глумел во серијата „Тhe Wire“, користел дрога „на застрашувачки места, со застрашувачки луѓе“. Сепак, тој рече дека не земал „ништо посилно“ од кокаин и марихуана.
„Си играв со оган. Беше само прашање на време кога ќе бидам фатен и ќе завршам на насловната страница на еден таблоид, во затвор, или, во најлош случај, мртов“, изјави тој во 2012 година.
Вилијамс, исто така, беше дел од серијата „Boardwalk Empire“ во улога на Алберт Вајт, и беше дел од филмските хитови како што се „Lovecraft Country“, „12 Years a Slave“, „Motherless Brooklynк“ и многу други…