На почетокот од состанокот управата му објаснила на тренерот дека клубот нема пари за големи трансфери во јануари и дека ќе се обиде бесплатно или со минимално обесштетување да дојде до големите желби на Куман.

Весникот „Мундо Депортиво“ пишува дека планот на Барселона за јануари е да ги реализира трансферите кои не успеа во последните денови од летниот преоден рок, односно дефанзивецот на Манчестер сити кој е дете на каталонскиот тим, Ерик Гарсија како и напаѓачот на Олимпик Лион, Мемфис Депај.

Планот на Барселона е во наредните два месеци да имаат секојдневни контакти со агентите на играчите за да ги уверат дека и Гарсија и Депај ќе имаат важна улога во тимот. Вториот чекор ќе биде на 1. јануари да им понудат договори на двајцата фудбалери, по што ќе стапат и во контакт со нивните екипи.

Во Барселона се надеваат дека и Манчестер сити и Олимпик Лион ќе изберат да ги продадат играчите за минимално обештетување отколку во јуни идната година и Гарсија и Депај да си заминат бесплатно.