Епидемијата на коронавирусот и мерките за спречување на ширењето на заразата ги принуди Дебарско – кичевската епархија и Општина Охрид да ги откажат манифестациите што традиционално се одржуваа за одбележување на празникот Богојавление – Водици.

Манифестацијата на осветување на водите на Охридското Езеро и фрлањето на Чесниот крст, што беше возобновена по осамостојување на земјата, за првпат нема да се одржи. Тоа значи дека нема да има ниту литии од црквите кон пристаништето, ниту богослужба на отворено, како ни масовното скокање по крстот на Градското пристаниште.

Според информации од Дебарско-кичевската епархија, празникот Богојавление – Водици ќе биде одбележан духовно во црквите со утрински богослужби и осветување вода. Потоа свештеник од Варош таа света вода ќе ја истури во Езерото, со што тоа симболично ќе биде осветено.

Водици и Богојавленските празници, пред се скокањето по крстот и Денот на рибарите во Охрид беа најмасовно посетена верска манифестација во земјата, на која одредени години присуствувале повеќе десетици илјади верници, како од градот, од околните места, но и од странство.