Во галеријата „Остен“ на 7 февруари, во 19 часот, ќе биде отворена самостојната изложба на слики од уметницата Ненси Тонг со наслов „Едноставност / Сложеност“, во дијалог со дело на Марина Абрамовиќ од колекцијата на „Остен“ Музејот. Во истата галерија на 10 февруари, со почеток во 12 часот, ќе се одржи и разговор со уметницата.

Ненси Тонг, која доаѓа од Хонг Конг, Кина, е добитничка на Наградата „Остен“ на „Остен“ Биеналето на цртеж Скопје 2022, С Македонија, и е првиот кинески уметник избран за финалист и добитник на награда на „Остен“ Биеналето на цртеж.

– За публиката, моите слики можат истовремено да изгледаат статични и спонтано динамични. Чувството на меѓусебност, коегзистенција на состојба на сликовно рамниште, е соодветна претстава и на двојноста на моето културно воспитување и на заматените односи кои секој од нас ги проектира кон светот. Мојата изложба ги истражува физичките и психолошките граници во дијалог со една од моите најомилени уметници, Марина Абрамовиќ, преку моите дела што ја поврзува мојата емотивна личност со нејзината инспиративна креативност – истакнува Ненси Тонг за својата изложба во галеријата „Остен“.

Изложбата претставува своевидна најава за програмските активности кои „Остен“ ќе ги организира на 22 и 23 февруари во Националната галерија, во објектот Чифте амам – отворање на официјалната изложба на „Остен“ Биеналето на цртеж Скопје 2022, каде ќе бидат изложени дела на околу 200 меѓународни уметници од 40 земји во светот, известија од „Остен“.