Осомничениот за нападот врз писателот Салман Ружди синоќа во судницата во Њујорк се изјасни за невин за обид за убиство, пренесуваат светските медиуми.

24-годишниот Хади Матар е обвинет за нападот врз Ружди кој се случи минатиот петок на конференција во Њујорк.

Уапсен веднаш по инцидентот, осомничениот веќе следниот ден се изјасни за невин на процедуралното рочиште.

Маскиран, со лисици и облечен во затворска униформа со црно-бели риги, Матар синоќа зборуваше преку својот адвокат.

Неговиот адвокат Натаниел Бароне на судењето истакна дека неговиот клиент има право на „фер судење“ и почитување на „презумпцијата на невиност“.

Матар „изненадан“ што Ружди преживеал

Во интервју за Њујорк пост, кој пишува дека контактирал со него во затвор, Хади Матар рече дека е „изненаден“ што Салман Ружди го преживеал нападот.

75-годишниот британски автор, кој беше прободен десетина пати во вратот и стомакот и со хеликоптер беше евакуиран во болница, накратко беше ставен на респиратор пред да му се подобри состојбата.

Матар не кажа дали е инспириран од фатвата издадена од Ајатолахот Хомеини во 1989 година од Иран, во која се повикува на смрт на писателот, а неговата книга „Сатански стихови“ беше прогласена за богохулије од иранскиот врховен водач.

Тој за Њујорк Пост изјави дека има „почитување за ајатолахот“, кој е „извонредна личност“.

Што се однесува до Ружди, Матар рече дека тој не е „добар човек“. „Не ми се допаѓа оваа личност“, рече тој.

„Тој е некој што го нападна исламот“, додаде тој. Гледајќи видеа од авторот на Јутјуб, тој откри дека е „лицемер“, но призна дека прочитал само две страници од книгата за која се тврди дека била причина за фатвата.

ВИДЕО: Британскиот писател Салман Ружди избоден со нож во Њујорк