Османи за оставките по пожарот: Праведна е одлуката на премиерот да ја чека експертизата на странските експерти
Треба да заврши експертизата и потоа да се донесе одлука за депонираните морални оставките по катастрофата од 8 септември во тетовската модуларна болница, а не одлуката да се донесе поради политички притисоци, изјави денеска Бујар Османи, шеф на дипломатија и висок функционер на ДУИ.
– Треба да заврши експертизата што ја спроведуваат странските експерти, во четвртокот стигнаа и германски експерти. Мислам дека посмислена, поцелисходна ќе биде одлуката која се заснова на објективни факти, отколку таа што се заснова само на политиканство и на повици на опозицијата. И да се реализира една оставка, само поради политички притисок, поради повик на опозицијата, не ја постигнува целта. Мислам дека најсоодветно е да се има експертизата, да се има моралниот и етичкиот момент, политичкиот и партискиот момент и сите други аспекти, за да се донесе мериторна одлука. Мислам дека е праведна одлуката на премиерот кога вели дека сака во комплетирањето на ова прашање да има и објективна експертиза од страна на странски експерти – изјави Османи.
Министерот и заменик -министер за здравство, Венко Филипче и Илир Хасани, генералниот и економскиот директор на Општата болница во Тетово, Флорин Бесими и Артан Етеми, поради морална одговорност од трагичниот настан од 8 септември, поднесоа оставки од функциите. На 8 септември, 14 лица го загубија животот во Тетово како резултат на пожарот што ја зафати ковид модуларната болница во Тетово.