Османи стави потпис и се заложи за мултилатеризам
Министерот за надворешни работи Бујар Османи заедно со Резидентниот координатор на Обединетите Нации во Република Северна Македонија Росана Дуџиак денеска во холот на МНР ја потпиша новата Рамка за соработка за одржлив развој (UNSDCF) за периодот 2021-2025.
-Како земја-членка на НАТО ги надминуваме стереотипите, залагајќи се за мултилатерализам, нагласи министерот за надворешни работи Бујар Османи, на потпишувањето на новата Рамка за соработка за одржлив развој, со ООН.
Според него, оваа рамка, ќе претставува основа за блиско партнерство на Владата и ООН, со цел исполнување на заложбите на земјата за почитување и унапредување на човековите права.
Османи додаде дека се очекува постигнување на четири цели од соработката: подобрување на животниот стандард, универзален пристап на сите граѓани до социјалните услуги, одржување на природните ресурси и биодиверзитетот, како и владеење на правото и родово базирани политики.
Потпишувањето на Рамката, како што посочија од МНР, симболички се совпаѓа и со Денот на ОН, 24 октомври и 75-годишнината од основањето на Организацијата на Обединетите Нации.