Османи – Калавера: Иднината на земјата и на регионот е во ЕУ
Вицепремиерот задолжен за европски прашања, Бујар Османи, се сретна со директорката за Западен Балкан при Генералниот директорат за проширување и соседска политика, Геновева Руиз Калавера и со директорката за Западна Европа, Западен Балкан и Турција при Европската служба за надворешни работи, Ангелина Ејхорст, кои се во посета на Македонија. Тие разменија мислења и впечатоци поврзани со исходот од октомвриски самит на Унијата, каде земјите – членки не успеаја да постигнат консензус за старт на преговорите.
-Навистина постои разочарување и чувство на неправда, но ве уверувам дека тоа нема да нѐ оддалечи од нашата амбиција да продолжиме на овој пат, да создаваме европски правила и стандарди во работењето, притоа застапувајќи ги и промовирајќи ги европските вредности во целиот регион – нагласи Османи.
Тие разговарале и за идните чекори на Владата, но и на европските институции, со цел да се задржи фокусот на европската перспектива на земјата.
-Тие се согласија дека независно од фактот што очекувањата не беа пресретнати, иднината на Република Северна Македонија, но и целиот регион е во Европската Унија, се наведува во соопштението.