Оскаровецот се изјасни за виновен за сексуално вознемирување
Оскаровецот Куба Гудинг Џуниор се изјасни за виновен за сексуално вознемирување во ноќен клуб во Њујорк, пренесуваат странските медиуми.
Актерот вчера пред судот се изјасни за виновен за обвинението дека допирал жени против нивна волја. Во долготрајната кривична постапка, тој беше обвинет за злоставување на три жени во периодот од 2018 до 2019 година на Менхетен.
Признавањето вина доаѓа речиси три години по неговото апсење во јуни 2019 година, кога една жена тврдеше дека ѝ ги „грабнал“ градите без нејзина согласност во ноќниот бар „Magic Hour Rooftop Bar & Lounge“ во близина на Тајмс Сквер. Неколку месеци подоцна, се појавија повеќе жени кои го обвинија за вознемирување.
Досега тој се изјасни за виновен по една точка од обвиненијата
Новите обвиненија вклучуваат сексуално вознемирување и допирање жени на непристоен начин во ноќниот клуб „LAVO“ во Њујорк и фаќање келнерка за задникот во клубот „TAO Downtown“, по што следел и несоодветен коментар. Актерот се изјасни за виновен по обвиненијата поврзани со клубот „LAVO“.
Неговиот случај во судот беше одложуван неколку пати, особено во време на пандемија кога повеќето судски процеси се одложуваа. Куба исто така беше обвинет од една жена дека двапати ја силувал во хотелска соба во Њујорк во 2013 година, но адвокатот на холивудскиот актер остро ги отфрли овие обвинувањата.