Организаторот на УС Опен во последен момент се откажа од суспензија на руските тенисери
Организаторот на последниот годинешен гренд слем турнир, УС Опен, призна дека сериозно размислувал да ги следи стапките на Вимблдон и да забрани учество на руските и белоруските тенисери и тенисерки.
Сепак, во последен момент е донесена одлука да не суспендираат тенисерите и наместо тоа ќе одржат хуманитарен настан за собирање средства за Украина на нејзиниот национален Ден на независноста, на 24 август.
Со ваквата одлука организаторот дозволи Русинот Данил Медведев да ја брани титулата која ја освои минатата година откако во финалето беше подобар од Новак Ѓоковиќ во три сета.
Настапот на УС Опен го потврди белоруската тенисерка Викторија Азаренка.
– Азаренка брзо ни одговори. Таа рече дека тоа е избор на играчите и јас сакам да играм – изјави директорката на УС Опен, Стејси Алистер.
Засега не е познато дали руските и белоруските тенисери ќе настапат на хуманитарниот настан.