Орданоски: Ми кажаа дека сум бил меѓу петте најследени луѓе во државава
Новинарот Горан Михајловски главен уредник на порталот СДК.МК во своето денешно сведочење во процесот „Таргет-Тврдина” во кој тој е оштетен рече дека прв пат сознанија дека на прес конференција на СДСМ во 2015 година добил папка со негови прислушкувани разговори, а потоа од СЈО добил потврда дека бил присчушкуван.
Тој рече дека се чувствува оштетен и рече дека побарува оштета од милион денари.
Новинарот Борјан Јовановски од НоваТВ пак истакна дека кога биле објавени “бомбите” на СДСМ дознал, а потоа и добил транскрипти од разговори во кои јас сум бил прислушкуван.
– Се чувствувам оштетен и побарувам оштетно побарување – рече Јовановски.
Новинарот Сашо Орданоски исто така оштетен во овој случај нагласи дека има 10.000 транскрипти од неговите следени телекомуникации.
– Ме следеле мене и сопругата физички. Не само што чувствувам имам и морална и материјална штета бидејќи во воздух ми е дигнато возило во 2015 година. Потоа извесно време ја напуштив државава и живееав неколку месеци надвор од Македонија. Кога ми ја дадоа папката со транскриптите ми кажаа дека сум еден од петте најследени луѓе во државава – рече Орданоски.
Новинарката Сашка Цветковска пак рече дека од прес конференцијата на СДСМ во 2015 година дознала дека е прислушкувана и тогаш добила транскрипти од нејзини разговори.
-Во СЈО кога давав исказ дознав за временската рамка во која сум била прислушкувана. Се чувствувам оштетена и побарувам оштетно побарување – нагласи Цветковска.
Обвинети во овој предмет за нелегално прислушување се Сашо Мијалков, поранешен директор на УБК, Гордана Јанкулоска, поранешна министерка за внатрешни работи и други лица од некогашната УБК.
Според обвинението за „Таргет-Тврдина” преку три системи за следење на комуникациите во УБК, во периодот од 2008 до 2015 година незаконски следела 4.286 телефонски броеви без да бидат издадени судски наредби.