Oпштина Велес утре ќе изврши второ авионско прскање против комарци
Општина Велес ја информира јавноста дека, второто авионско третирање против комарци ќе го изврши на ден 29-ти јуни во понеделник во периодот од 05:00 до 06:30 часот. Доколку временските услови не дозволуваат авионско прскање истото ќе се изврши наредниот ден, 30 јуни-вторник.
Како што појаснуваат од Општина Велес, границата на третирањето е Езеро Младост, село Отовица, месност Јарбош, по течението на Вардар од север до Башино Село низ Велес, се до вливот на реката Бабуна и село Горно Караслари. На запад границата започнува од населбата Превалец, преку населбата Керамидна кон фабриката „Киро Ќучук” и Горно Оризари.
Со третирањето ќе биде опфатено целото градско и приградско подрачје, како и целото течение на реката Вардар на овој потег. И оваа година ќе се третира рекреативниот центар Езеро „Младост” со непосредната околина.
Тие ги известуваат пчеларите во времето на третирање и 3-4 часа потоа да ги затворат кошниците со пчели, заради можноста од влијание на средството со кое се врши третирањето врз безбедноста на пчелните семејства.