Општина Велес зоопшти дека издвоила 1.536.651 денари од буџетот наменети за еднократна парична поддршка за сите првачиња запишани во општинските училишта во учебната 2024/2025 година.

На сметката на 461 родител односно старател на првачињата запишани во основните училишта во Велес, е исплатена еднократната парична помош во висина од 3.000 денари, велат од Општината. По прибирањето на податоците од сите училишта завршена е и административната проверка, со што денеска паричната поддршка ќе биде на располагање на нивните трансакциски сметки.

– Општина Велес продолжува да инвестира во најмладите и иднината на градот, велат од локалната самоуправа.

Но, наспроти објавениот износ од општинскиот буџет (1.536.651 денари / 24.975 евра), не е јасно зошто пресметката покажува помал износ – 461 дете по 3.000 денари изнесува 1.383.000 денари, односно 22.477 евра.