Општина Тетово започна со повеќе активности за кои сметаат дека ќе ја подобрат безбедноста на булеварот „Видое Смилевски-Бато” попознат како Индустриска улица.

Се поставува ограда на средината од булеварот која треба да спречи преминување на коловозните ленти вон пешачките премини. Воедно се поставуваат грпки на коловозните ленти поточно на пешачките премини, за како што соопштија од општината да се овозможи намалување на брзината на возилата на оваа делница.

-Ова се прави со цел да се спречат несреќи кои честопати го загрозуваат животот на граѓаните. Ова е транзитен пат, овој дел од градот е густо населен, а има многу деца кои следат настава во основното училиште „Кирил и Методиј”. Во текот на следната недела, ќе поставиме и дополнителна вертикална сигнализација, а ќе ги обележиме и пешачките премини, се вели во известувањето од општина Тетово.

На 13 јануари шестгодишно девојче го загуби животот откако беше удрено од возило на овој булевар, по што на 25 јануари беше организиран и јавен протест на жителите и граѓаните кои бараа преземање итни мерки за да се спречат идни несреќи и поголема полициска контрола на сообраќајот.

Според СВР Тетово, во текот на минатата, 2020 година, на улица „Видоја Смилевски-Бато” во Тетово регистрирани се, односно се случиле вкупно 50 сообраќајни несреќи, од кои 30 со повредени лица и 20 само со причинета материјална штета. Оваа делница претставува и магистрален пат.