Општина Ѓорче Петров забрани сушење алишта во дворови
Градоначалникот на Општина Ѓорче Петров, Александар Наумовски, во објава на својата Фејсбук-страница пишува дека Советот на општината усвоил измени во Одлуката за комунален ред и мерки за нејзино спроведување, со кои се забранува сушењето алишта во дворните места на територија на општината кои имаат поглед на улица или на плоштад.
-Да почнеме од поблагите мерки, со цел доследно спроведување на прописите. За да не стигнеме до казни. Превенција пред репресија- вели Наумовски во коментар под објавата.
Во дворните места се забранува оставање, складирањеодносно собирање на каква било амбалажа, кабасти предмети од домаќинството, градежен и друг отпад и какви било други предмети што предизвикуваат нагрдување на изгледот и неуредност на просторот.
Во дворните места што се со поглед кон улица или плоштад, не е дозволено:
– сушење на алишта,
– тревата да биде повисока од 10 см,
– да се засадуваат овошни дрвја чии плодови ја валкаат јавната површина,
– гранчињата на украсните и жбунести растенија да ја преминуваат регулационата линија на јавната површина и да пречат на безбедноста на сообраќајот и движењето на луѓето.
Веста предизвика многу коментари на социјалните мрежи, а дел од граѓаните му замеруваат на градоначалникот дека се занимава со неважни работи, додека во општината има многу поголеми комунални и други проблеми.