Општина Ѓорче Петров: Од 20 згради за домување, 6 веќе се изградени
Деталниот урбанистички план СЗ15 е всушност разработка на план кој e донесен во 2014 годнина, со отстранување на сите негови недостатоци и зголемување на хуманоста на живеењето, а не „предвидување на нови згради” и „нови жители”. Ова го тврдат од Општина Ѓорче Петров, како одговор на обвинувањата на Иницијативата против урбано дивеење, и додаваат дека вкупната бруто развиена површина од сите градби во опфатот изнесува 138 918 м². Според нив, во оваа површина се вброени и сите постојни – вкупно 37 градби, додека максимално можната површина за домување изнесува 88 308 м², во која влегуваат и веќе изградени станбени згради.
-Од вкупно 20 градби со намена домување, 6 се веќе реализирани и за нив не се предвидува развој; вкупната квадратура од овие веќе изградени згради во опфатот изнесува 30 307 м², од што произлегува дека вкупната нереализирана површина за градење изнесува 58 001 м², распределена во 16 градежни парцели – велат од Општината.
Оттаму појаснуваат дека во рамките на целиот плански опфат максимален можен број на жители изнесува 1359, но во оваа бројка влегуваат и постојните 467 граѓани. Од Општината тврдат дека со решението се зголемени растојанијата помеѓу планираните градби и зголемени се јавните површини и површините под зеленило.
-Овој план е донесен во транспарентна и јавна постапка на која претходеа 2 јавни анкети, а обезбедени се позитивни мислења и согласности од сите релевантни институции, вклучувајќи ги Град Скопје и Министерството за транспорт и врски – информираат од Ѓорче Петров.