Општина Центар: Ниеден суд не утврдил дека планот е незаконски, „Шанса за Центар“ да не манипулира
Општина Центар реагира на објавата на граѓанската иницијатива и советничка група во Советот на општината „Шанса за Центар“, која објави дека Општината издала одобрение за градба на втора зграда спроти хотелот „Холидеј Ин“ и дека станува збор за „незаконски план“.
За тоа дали одредена постапка е законска или не, надлежен е единствено судот и судските органи. Ниеден суд, ниту истражен орган се нема произнесено дека некој од ДУП-овите е незаконски или дека на било кој начин не смеат да се спроведуваат. Оттаму, законска обврска на општината е да ги спроведува и постапките предвидени со законите за градба – велат од Центар.
Оттаму додаваат дека ваквите неточни и тенденциозни информации пласирани во јавноста имаат за цел да и наштетат на угледот на општината и апелираат „Шанса за Центар“ да се воздржат од ваквите постапки и да не ги дезинформираат граѓаните.