Општина Центар објави јавен повик до сите евидентираните невработени граѓани кои се заинтересирани да се вклучат во проектот „Грижа за секое дете“ кој е дел од  програмата „Општинско-корисна работа“ поддржана од УНДП во соработка со Агенцијата за вработување, и да бидат ангажирани како воспитувачи и негуватели во градинките во оваа општина.

Образованието од рана возраст е од суштинско значење за обликување на когнитивните, емоционалните и социјалните вештини на децата. Преку проектот, за децата обезбедуваме средина во којашто ќе може безгрижно да растат и да комуницираат со своите врсници, а за ангажираните лица поддршка за професионален развој и понатамошен напредок во кариерат – вели градоначалникот Горан Герасимовски..

Вкупниот период на ангажман на невработените лица преку програмата изнесува 9 месеци во кој влегува и потребната обука, а ќе се работи со скратено работно време од 20 часа неделно.

За кандидатите кои ќе бидат избрани и вклучени во програмата за општинско-корисна работа се предвидува паричен надоместок во висина од 13.750,00 денари бруто износ за времетраењето на обуката и работното ангажирање, со вклучени данок на личен доход и осигурување за инвалидност и телесно оштетување причинето со повреда на работа и професионална болест – се наведува во јавниот повик.

Невработени лица кои ќе се пријават во програмата треба да припаѓаат на една од следните целни групи невработени лица: долгорочно невработени лица над 12 месеци во евиденција, со предност на невработени лица над 5 години; млади лица до 29 години; лица постари од 50 години; самохрани родители и жртви на семејно насилство.

Во проектот според повикот треба да бидат ангажирани 4 воспитувачи и 4 негуватели. За потребните квалификации, за условите и начинот на пријавување заинтересираните можат да се информираат во јавниот повик објавен на официјалната веб страница на Општина Центар.