Албанската опозиција вечерва ќе ги оддржи протестите во центарот на Тирана кои веќе неколку дена ги најавува лидерот на опозицијата Љуљзим Баша, од друга страна пак албанскиот премиер си замина во јужниот дел од земјата, каде ќе учестува на концертот на Карла Бруни.

За безбедноста на вечерашниот протест на обединетата албанска опозиција, ќе бидат ангажирани најмалку 1.700 полициски службеници, кои ќе бидат распоредени главно пред Владата и Парламентот, јавува Радио Слободна Европа.

Исто така ќе бидат ангажирани и припаднците на специјалната единица „Шќипоња“, кои ќе бидат распоредени пред полицскиот кордон пред двете институции, потоа припадници на сообраќајната полиција, како и лица без униформи од други сектори на МВР. Припадниците на единицата за брза интервенција и Националната гарда ќе бидат во состојба на готовност.

Во случај да има обиди за влегување во институциите и закана по животот на полициските службеници ќе биде употребен солзавец, како и водени топови. Во близина ќе има и повеќе противпожарни и возила на брза помош.

Во Тирана ќе има ограничено движење во поширокото подрачје каде што ќе има протест, а забранет е влез на автобусите кои превезуваат граѓани од внатрешноста во центарот на Тирана. Автобусите кои доаѓаат од севернот дел на земјата ќе се паркираат кај спортската палата „Аслан Руси“ додека оние од јужниот дел кај Економскиот факултет.

Протестот ќе почне во 20:00 часот. На барањето тој да трае до полноќ, полицијата дозволи протестот да трае два часа,односно до 22:00 часот.

И додека Тирана се подготвува за протестите, албанскиот премиер одлучи вечерва да оди на концертот на пеачката Карла Бруни во античкиот град Бутринт, во јужниот дел од земјата. Како што јавува Балканвеб Рама во Ксамил пристигнал со хеликоптер, додека друг хеликоптер ја набљудувал околната зона.

Истиот медиум јавува дека голем број полициски сили го опколиле Ксамил, за да се избегнат можни судири на шефот на албанската Влада со поддржувачите на опозицијата.