ОН ги повика Талибанците веднаш да ја прекинат офанзивата: Состојбата излегува од контрола
Генералниот секретар на ОН Антонио Гутереш ги повика Талибанците веднаш да ја прекинат офанзивата во Авганистан и предупреди дека „Авганистан излегува од контрола“.
„Време е да се запре офанзивата. Ова е момент за започнување сериозни преговори. Ова е време да се избегне продолжена граѓанска војна или изолација на Авганистан “, изјави Гутереш
Талибанските милитанти до петокот зазедоа три големи авганистански градови и голем број провинциски главни градови, забележувајќи големи воени успеси во последните недели на теренот, а исто така го стегаат т обрачот околу Кабул, чија судбина сега е неизвесна.
Гутереш ги повика сите страни да направат повеќе за заштита на цивилите.
Тој, исто така, изјави дека е „длабоко вознемирен од првите индикации дека талибанците воведуваат строги ограничувања за човековите права во областите под нивна контрола, особено врз правата на жените и новинарите“.
„Особено застрашувачки се потресните извештаи за одземање на тешко стекнатите права на авганистанските девојки и жени“, рече тој.
За време на владеењето на талибанците помеѓу 1996 и 2001 година, жените не можеа да работат, а на девојчињата не им беше дозволено да посетуваат училиште. Жените мораа да го покријат лицето и да бидат придружувани од роднина од машки пол, доколку сакаат да ја напуштат куќата.
Обединетите нации ја набљудуваат и оценуваат безбедносната состојба во Авганистан „час по час“ и преместуваат дел од персоналот во Кабул, но не евакуираат никого од земјата, изјави портпаролот на ОН
Светската организација има околу 3.000 локални вработени и околу 300 меѓународни лица на терен во Авганистан.
САД испраќаат околу 3.000 дополнителни војници за да помогнат во евакуацијата на персоналот на американската амбасада, а Велика Британија распоредува околу 600 војници за евакуација на своите граѓани.
Повеќето од 3.000 американски војници треба да пристигнат до крајот на викендот, соопшти Пентагон.
Другите амбасади, вклучително и оние на Холандија, Германија и Норвешка и хуманитарните групи најавија дека и ги повлекуваат своите луѓе.
Од почетокот на годината, речиси 400.000 луѓе се раселени поради конфликти низ Авганистан, а 11.илјади внатрешно раселени лица дошле во Кабул помеѓу 1 јули и 12 август. соопштија Обединетите нации.
Талибанците се на 50 километри од главниот град, европските земји ги затвораат амбасадите во Кабул