Германскиот канцелар Олаф Шолц денеска побара парламентот да гласа за доверба на владата во понеделник, на 16 декември, со што во случај на недоверба ќе се овозможи одржување на предвремени парламентарни избори во февруари.

Доколку Шолц ја загуби довербата, претседателот Франк-Валтер Штајнмаер ќе одлучи дали ќе го распушти Бундестагот. Тој има рок од 21 ден да ја донесе таа одлука, а по распуштањето на парламентот, изборите мора да се одржат во рок од 60 дена.

Анкетите покажуваат дека партијата на Шолц заостанува зад главниот опозициски блок на десниот центар на Фридрих Мерц. Заменик-канцеларот Роберт Хабек, чии Зелени се уште позади, исто така се натпреварува за највисокото канцеларско место. Екстремно десничарската Алтернатива за Германија, која добива на сила според анкетите, ја предложи Алиса Вајдел за свој кандидат за канцелар, но речиси и да нема шанси за успех, бидејќи сите други партии одбиваат да соработуваат со неа.

Германија нема гласање за доверба на владата од 2005 година, кога тогашниот канцелар Герхард Шредер ја загуби довербата, што доведе до предвремени избори, на кои тесно победи Ангела Меркел.